تخطيط الوجبات

تخطيط الوجبات

أهلا يا أصدقاء

 أحكي لكم اليوم تجربتي مع تخطيط الوجبات.

مشكلتي كانت اني اطلع اكثر من مره في الاسبوع للسوبرماركت عشان بعض الاغراض تكون ناقصه واحيانا اكثر من مره اتصل على زوجي يجيب شي وهو راجع،

واحيانا بعض الاشياء خصوصا الي ما تباع الا بكميات كبيره تخرب عندي في الثلاجة مثل علبة السبانخ الطازجة.

لمن بحثت وجدت شي عند الاجانب جدا مشهور بسبب ضيق وقتهم الي هو التخطيط لوجبات الأسبوع

النظام عباره عن تحديد كل وجبات الاسبوع (فطور-غدا-عشاء)

وكتابة قائمة بالمقاضي الي نحتاجها لهالقائمة فقط، وبكميه تناسب اسبوع واحد أو اثنين بس.

وحطي فبالك كل شي يحتاجه الاسبوع/العصيرات وعدد الخبز الي يستهلك والاجبان و الحليب وكل شي من الفطور للعشاء وحتى لاوقات السناك او الوجبات الخفيفة بعد.. لانخلين شي.

هالحركة مو بس توفر الاكل، توفر الوقت بعد لانها تحتاج ذكاء في التخطيط واستخدام نفس العنصر لأكثر من طبق بحيث نقدر نقطعه مره وحده في يوم واحد ونستهلكه خلال اسبوع، لكن بشرط عدم تكرار الوجبات.

مثلا، نختار اننا نصلح هالاسبوع فوتيتشيني، معناته راح نحتاج حليب منزوع الدسم ، نروح نحاول نفكر بطبق يحتوي على حليب قليل الدسم مثلا شوربة بيضا وهكذا.

مثال ثاني السبانخ ، ممكن يتصلح منها بيض او تنحط مع المكرونة او فطاير السبانخ او يتصلح فيها السموذي الأخضر.

فالشغله تحتاج ترتيب، واكثر شي يساعد عليها:

أولاً

 ان الواحد يكتب (منيو) فطور، غدا، عشا..

ويكتب فيه كل شي يعرف يصلحه ويفضل تنكتب جنبها المقادير الي تحتاج تكون طازجة (لان الي مو طازج عادي متوفر طوال السنه مثل السكر والدقيق والرز.مايحتاج نشتريه كل اسبوع).

الأمر الثاني

نحدد فاكهتين او ثلاثه فقط للاسبوع لان الفاكهه بسرعه تخرب وحتى لو شكلها انها كويسه تكون فقدت كثير من قيمتها الغذائية وهي تنتظر في الثلاجة، فنحاول ناكل الاشياء الي تخرب اسرع اول، يعني الفراوله في بدايه الاسبوع ناكلها والتفاح في اخره وهكذا.

(ملاحظة : اذا وضعنا الأكل في حاويات شفافة راح نستهلكه اسرع لأنه دايم واضح أمامنا فلا تتركون الأغراض في أكياس عشان ماتنسون الي بداخلها)

الشي الثالث

نحدد يوم ثابت لطلعة السوبرماركت وهاليوم يكون اجازه من الطبخ، نطلع مطعم قبل المقاضي او نطلب من برا ويكون هاليوم فيه اعداد الاسبوع الجاي،

الاعداد يكون بكتابه المقادير و (تقطيع بعضها)

مثلا نحتاج بصل مقطع هالثلاث ايام الجايه نقطع بصله ونكيسها واي شي يحتاج تقطيع ومايخربه التقطيع نسويه،(ممكن تطلبين زوجك يساعدك في هاليوم

خيار رابع

نحدد يوم في الاسبوع تجربه وصفة جديده او طريقة فطور جديدة وناخذ مقاديرها معنا

 خامس شي

 اذا مع كل هالترتيب لقينا اشياء ماخلصت قبل ماتخرب نفرزنها او بسرعه نصلح بها عصير او اي وجبة ونأجل الوجبات الي اغراضها مو مهدده بالخراب..

الشي السادس

 لازم نعرف مواعيد فساد الأطعمة وتحصلونها على النت (الفواكه والخضار والاطباق المطبوخة)

وهذي صورة مساعدة

(ماحصلت شي عربي للأسف لكن بأترجم هالصفحة و أرجع أرفعها لكم بإذن الله)

السابع

 من احسن الاشياء انك تسوين زياده في الوجبة وتخلينها سواء حق عشاء بكره او تفرزنين الكمية وتستخدمينها يوم ثاني متى ماصار وقتك ضيق..

لكن مو هذا موضوعنا
/ اذا حابين اكتب عن تقصير وقت الطبخ وحلول تخلي فتره المطبخ اقصر خبروني لاني انسانه ما احب اطول وانا اطبخ ودايم اخترع حلول وابحث عنها..

هالنظام في البدايه راح تكون فيه اخطاء مثلا الخبز يخلص اسرع مما توقعت او عدد الطماطم باقي منه ماخلص عادي ادون هالملاحظه واتفاداها المره الجايه..

حاليا كل شي مكتوب في جوالي بس ان شاء الله راح اطبع خطتي الاسبوعيه مع المقادير والوصفات واصير اشارككم كل اسبوع

ونصير نشتغل شغل جماعي ونستفيد من التجارب لكن انتظر شي يخلص وابدا هالحركة معكم باذن الله

و كمان بيكون هناك إشتراكات شهرية، مع خطط تغذية و رجيم و ميزات كثيرة كثيرة صراحة (تراها سر! بس بأقولك إياه قريب)، عشان كذا راقبوا ايميلاتكم لتعرفو وشو و إحتمال يجيك مجاني!!!

فادكم الموضوع واذا حابين تضيفون أي شي يتعلق بالمطبخ اكتبوا لي في التعليقات

 

Share this post



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

آخر خطوة

سجلي بريدك الالكتروني للحصول على برنامج الرجيم السريع الخارق
نعم! اريد الجسم المثالي
Close